info@fristundalaesi.reykjavik.is

Náttúru og umhverfislæsi – Almennt starf

Almennt starf

Græn skref 

Öll frístundaheimili Reykjavíkurborgar eru þátttakendur í verkefninu Græn skref sem snýst um að efla vistvænan rekstur og minnka umhverfisáhrif í fjórum skrefum. Mikilvægt er að fræða börnin um verkefnið Græn skref og fá þau til að taka virkan þátt. Hægt er að gera það með því að flokka allan úrgang frístundaheimilisins til endurvinnslu, hafa flokkunina vel sýnilega og endurnýta það sem til fellur. Það mætti nýta til dæmis eggjabakka, dósir og tilfallandi efnivið úr eldhúsi í listasmiðju eða önnur verkefni. Þannig minnkar sorp frá frístundaheimilum og starfsfólkið og börnin verða meðvitaðri um umhverfi sitt og nýta betur það sem til er. Með því að leyfa börnunum að taka virkan þátt í að flokka og endurnýta, fræðum við þau um mikilvægi sjálfbærni fyrir nærumhverfi okkar og heiminn.

Áhugaverðir hlekkir:

Græn skref 

Náttúran

Landvernd

Veðurfar

Veðurfar er algengt umræðuefni á Íslandi og hefur það mikil áhrif á mótun íslenskrar menningar eins og sést meðal annars á klæðnaði og húsakynnum. Það getur verið afar áhugavert fyrir börnin að skoða hversu fjölbreytt veðurfar getur verið hérlendis og jafnvel erlendis. Kjörið er að búa til veggspjald þar sem tiltekið veðurfar er tekið fyrir og finna hvaða orð tengjast því. Börnin geta síðan teiknað myndir í tengslum við það veðurfar. Það getur til að mynda verið mjög forvitnilegt að sjá hversu mörg orð lýsa snjó.

Áhugaverðir hlekkir:

Veður

Orðskýringar um veðurfar 

Áhrif loftlagsbreytinga á börn – Fræðslumynd Unicef

Orðatvenna, orðtak og málsháttur mánaðarins

Klæðaburður

Myndrænar leiðbeiningar fyrir börn um klæðaburð geta reynst mikilvægar. Nauðsynlegt er að hafa upplýsingarnar í augnhæð barna þannig að þau taki frekar eftir þeim. Mætti þá setja upp mynd og texta þar sem fram kemur hvers konar klæðaburður sé ráðlagður viðkomandi dag. Gæti þar til dæmis staðið: Í dag er veður fyrir regnföt og við hliðina á textanum væri mynd af barni í regnfötum. Yfir vetrartímann er hægt að nýta sér viðmið um klæðaburð héðan. Þessar upplýsingar er einnig hægt að finna á fleiri tungumálum sem gæti verið gott að hengja upp í frístundaheimilinu eftir því hvaða tungumál eru töluð þar.

Áhugaverðir hlekkir:

Klæðaburður


ff

Árstíðir

Tilvalið er að sýna börnum hversu ólíkar árstíðirnar vetur, sumar, vor og haust geta verið. Hægt er að gera það með því að taka ljósmynd af sama staðnum utandyra á mismunandi tímum og hengja myndirnar síðan upp með útskýringu. Þetta getur hjálpað börnunum að gera sér grein fyrir breytingunum sem verða á náttúrunni og umhverfinu á milli árstíða. Einnig er skemmtilegt að búa til stórt tré og teikna eða líma á það laufblöð eftir árstíðum. Jafnvel mætti skrifa upp ljóð á veggspjöldin með hverri árstíð, eins og ljóðin Lóan er komin, Maístjarnan og Sá ég Spóa sem tengjast vorinu. Auk þess getur verið áhugavert að leyfa börnunum að prufa smáforritið Elmer’s Photo Patchwork þar sem þau taka myndir af fallegu mynstri náttúrunnar til þess að skreyta fílinn Elmer og vini hans með. Síðan er hægt að fylgjast með hversu fjölskrúðug mynstrin verða með árstíðunum.

Áhugaverðir hlekkir:

Árstíðirnar

Upplifun árstíða

Smáforrit:

Elmer’s Photo Patchwork er tilvalið að nota í útiveru. Þá nota börnin snjalltæki til þess að taka myndir af náttúrunni eða fallegu mynstri í umhverfinu. Myndirnar eru síðan notaðar til þess að skreyta fílinn Elmer og vini hans.


Gönguferðir og umferðarreglur 

Börnin læra að þekkja nærumhverfi sitt þegar farið er í stuttar gönguferðir. Nota má smáforritið Innipúkinn eða vef Samgöngustofu til þess að fræða börnin á skemmtilegan hátt um helstu umferðarreglurnar áður en lagt er af stað. Einnig getur verið skemmtilegt að fara í Sprengjuleik til að hjálpa börnunum að læra að þekkja umferðarmerkin. Í ferðinni er hægt að fara á græn svæði borgarinnar, leikvelli, heimsókn í leikskóla, hverfisbókasafnið og margt fleira. Gaman er að sækja efni í náttúruna, til dæmis laufblöð og greinar til þess að nota í föndurgerð. Í lok gönguferðarinnar er gott að ræða við börnin um hvað þeim fannst merkilegast og skemmtilegast. Gefum okkur 10 mínútur til að eiga í samskiptum við börnin um ferðina. Sáu þau eitthvað áhugavert í nærumhverfinu eða heyrðu þau kannski skrítið hljóð?

Hægt er að kortleggja allar gönguferðir með smáforritinu Wikiloc, merkja inn staði, taka myndir og skrifa texta. Þá er jafnvel hægt að leiðbeina eldri börnunum hvernig þau geta komið sér sjálf á milli staða með strætó

Áhugaverðir hlekkir:

Úti í umferðinni

Strætó

Sprengjuleikur

Samgöngustofa

Úrvinnsla úr vettvangsferðum

Smáforrit:

Innipúkinn í umferðinni leiðbeinir börnum hvernig þau eigi að haga sér í umferðinni. Þau fræðast um umferðamerkin, umferðarreglur og fleira sem er mikilvægt að kunna þegar haldið er af stað.

f

Þegar farið er í gönguferðir eða hjólreiðar er hægt að nota smáforritið Wikiloc Outdoor til þess að búa til kort. Þá eru ákveðnir staðir merktir inn, skrifaður texti og teknar myndir. Auk þess er hægt að fylgjast með ferðinni í rauntíma á netinu eða fylgja henni seinna með því að skoða þær merkingar sem hafa verið settar inn í forritið. Á heimasíðu Wikiloc er einnig hægt að fletta upp fjölbreyttum gönguleiðum og hjólaleiðum víðsvegar um heiminn.