10 einföld atriði til þess að hefjast handa
Hér er að finna nokkrar einfaldar hugmyndir sem hægt er að styðjast við til að hefja vinnu við eflingu máls og læsis barna innan frístundaheimila.
1. Myndrænt skipulag
Höfðum til barna með myndrænu dagskipulagi, valtöflu og matseðli.
2. Allt merkt
Merkjum allt milli himins og jarðar á frístundaheimilinu með orði og mynd. Gaman er að gera það í samstarfi við börnin.
3. Bækur sýnilegar og snúa fram
Höfum bækur sýnilegar og látum skemmtilegar bækur snúa fram til að auka áhuga barnanna.
4. Gæðastund í síðdegishressingu
Gerum hressinguna að gæðastund með spjalli við börnin eða ævintýralegri sögustund.
5. Upplýsingaflæði til barna
Aukum upplýsingaflæði til barnanna með myndrænum reglum, leiðbeiningum og sáttmálum sem eru sett upp í augnhæð barna. Tilvalið er að hengja upp fjölbreytt veggspjöld Frístundalæsis t.d. tilfinningavegspjaldið.
6. Notalegt lestrarhorn
Komum upp notalegu lestrarhorni með fjölbreyttu úrvali af bókum á mörgum tungumálum. Tilvalið er að skreyta rýmið með bókaormi þar sem bækurnar sem börnin hafa lesið eru kortlagðar.
7. Tungumál frístundaheimilisins
Hvaða tungumál eru töluð á frístundaheimilinu? Kortleggjum þau og höfum stafróf þeirra sýnileg.
8. Tíu mínútna reglan
Notumst við 10 mínútna regluna: Gefðu þér 10 mínútur til að eiga í samskiptum við hvert barn sem stendur höllum fæti félagslega eða er fjöltyngt með íslensku sem annað tungumál.
9. Algengustu orðin
Hver eru 100 algengustu orðin í íslensku? Höfum þau sýnileg annað hvort á gólfi eða á veggjum.
10. Leikur dagsins
Bjóðum upp á leik dagsins. Skipuleggjum einn hópleik í útiveru ásamt því að hafa lýsingu og reglur sýnilegar.